Views: 1
ដោយៈ សុផល / ភ្នំពេញៈ ក្រសួងកិច្ចការនារី និងអង្គការអុកស្វាម បាននិងកំពុងសហការគ្នារៀបចំវេទិកាថ្នាក់ជាតិ ស្តីអំពី “ការលើកកម្ពស់សហគ្រិនភាពរបស់ស្ត្រី នៅតំបន់អាស៊ាន តាមរយៈគោលនយោបាយគាំពារសង្គម និងគាំពារគ្រួសារ” ដើម្បីបង្កើនការយល់ដឹង អំពីគោលនយោបាយ និងកម្មវិធីពាក់ព័ន្ធនឹងការងារថែទាំគ្មានប្រាក់កម្រៃ និងការងារផ្ទះ និងគោលនយោបាយជាតិគាំពារសង្គម ព្រមទាំងបង្កើតនូវកិច្ចពិភាក្សា ក្នុងចំណោមភាគីពាក់ព័ន្ធនៅកម្ពុជា និងសហគមន៍អាស៊ាន អំពីគោលនយោបាយគាំពារសង្គម និងគាំពារគ្រួសារ ដើម្បីលើកកម្ពស់ភាពអង់អាចរបស់ស្ត្រី និងពង្រឹងនូវសក្តានុពលសហគ្រិនភាពរបស់ស្ត្រី។
វេទិកានេះ គ្រោងនឹងធ្វើនៅព្រឹកថ្ងៃទី៧ ខែកញ្ញា នៅសណ្ឋាគារសុខា ហើយនឹងមានអ្នកចូលរួមផ្ទាល់ ចំនួនប្រមាណ ២០០នាក់ និងចូលរួមតាមរយៈ Zoom ប្រមាណ ៥០០ នាក់។
អ្នកចូលរួម គឺមានថ្នាក់ដឹកនាំ និងតំណាងមកពីក្រសួង មន្ទីរ អគ្គនាយកដ្ឋានរដ្ឋបាលថ្នាក់ជាតិ និងថ្នាក់ក្រោមជាតិ អង្គការសង្គមស៊ីវិល សហជីព សហគ្រិន និងស្វ័យនិយោជន៍ស្ត្រី អង្គទូតនានា ដៃគូអភិវឌ្ឍន៍ និងលេខាធិការដ្ឋានសមាគមអាស៊ានផងដែរ។
វេទិកានេះ គឺជាផ្នែកមួយនៃកិច្ចផ្តួចផ្តើមរួមរបស់ក្រសួងកិច្ចការនារី និងអង្គការអុកស្វាម ក្រោមចក្ខុវិស័យកម្ពុជា ក្នុងនាមជាប្រធានអាស៊ាន ឆ្នាំ២០២២ ក៏ដូចជា លេខាធិការដ្ឋានអាស៊ាន ដើម្បីលើកកម្ពស់សហគ្រិនភាពរបស់ស្ត្រី ពង្រឹងកិច្ចគាំពារសង្គម និងរួមចំណែកដោះស្រាយបញ្ហាការងារថែទាំគ្មានប្រាក់កម្រៃ និងការងារផ្ទះ នៅតំបន់អាស៊ាន។V / N