Am Conseil huet d’Regierung verschidden Decisiounen aus der leschter Tripartite op den Instanzewee geschéckt.
Virop steet déi linear Adaptatioun d’nächst Joer vum Steiertarif bei de Paien, dat an Héicht vun 2,5 Indextranchen. En anere Volet betrëfft Steierkreditter, déi deels retroaktiv op den éischte Januar dëst Joer gëllen an op Basis vun zwou Indextranchë gerechent ginn.
Am Text geet et ënnert anerem nach ëm zäitlech limitéiert Kompensatiounen fir d’Betriber.
Duerch de Regierungsrot goung och de Projet, fir dass ee vum Steierjoer 2023 u Scholdzënsen op Immobilien-Prêten an Héicht vun 3.000, amplaz wéi bis ewell vun 2.000 Euro d’Joer kann ofsetzen.
A Saache Logement krut de Staat d’Erlabnis, finanziell ze hëllefen beim abordabele Logement beim Projet "Cité militaire"zu Dikrech.
De Findel kritt nei Infrastrukture fir d’Pëtrolsproduiten an et gouf den Accord fir ee Lëtzebuerger Haus op den nächsten olympesche Summerspiller 2024 zu Paräis.
