Namibia
This article was added by the user . TheWorldNews is not responsible for the content of the platform.

Aaleli yopamuthigululwakalo monooli ya tinda oondjokana dhomashenge

Aaleli yahetatu yopamuthigululwakalo yomihoko dhaawambo monooli oya popi kutya etokolo lya ningwa kOmpangu yoPombandambanda okupitika oondjokana dhaantu yoludhi lumwe paukashikekookantu, olya ya pambambo oonkuluhedhi nomudhigululwakalo gwaawambo.

Omasiku ga zi ko Ompangu yoPombandambanda oya gandja elombwelo kepangelo li taambe ko oondjokana dhomashenge nenge aantu yoludhi lumwe paukashikekookantu mboka ya hokanena pondje yoshilongo yo ya kale taya tyapula omauwanawa agehe ngoka ge niwe kaantu ayehe mboka ya hokanathana.

Aaleli yopamuthigululwakalo oya popi kutya okukala inaaku taliwa oonkuluhedhi nomudhigululwakalo pethimbo kwa ningwa etokolo ndyoka, oshaya pambambo uuthemba waakwashigwana noyewetike kaaye na oshilonga “okuyelekanitha nomuthigululwakalo gwaakwiilongo mboka taya gandja oshimaliwa shokuyambidhidha onkalo [yomashenge]”. “Pakutala muule etokolo ndyoka olyu ulike omuthigululwakalo gwoshikwiilongo gwa ya moshipala omudhilulwakalo gwaNamibia,” osho aaleli yopamuthigululwakalo ya popi ngaaka.

Shoka osha popiwa okupitila mombapila yomunashipundi gomalelo gomithigululwakalo moshilongo, elenga Immanuel /-Gâseb, oshiwike sha zi ko.
Omunashipundi gwomalelo gopamuthigululwakalo gomonooli yoshilongo, elenga enene Ndilimani Iipumbu, okwa popi kutya ombapila ndjoka oya shainwa kaaleli ayehe yopamuthigululwakalo monooli yoshilongo.

Aaleli mboka oya kalela po omihoko ngaashi gwUukolonkadhi, Uukwaluudhi, Ombalantu, Ongandjera, Ombadja, Uukwambi, Oukwanyama sho wo gwaNdonga.

Iipumbu okwa popi kutya omalelo goopamuthigululwakalo otaga ka ninga oshigongi shiikundaneki okupopya kombinga yoshikumungu shoka shomashenge uuna ya pewa eyamukulo ku/Gâseb. Mombapila ndjoka, omalelo gahetatu gopamuthigululwakalo monooli yoshilongo oga popi kutya oondjokana dhaantu yoludhi lumwe paukwashikekookantu odhi li ompinge nokatendo 14 mEkotampango lyaNamibia.

Oya popi kutya ongaaleli yopamuthigululwakalo, oye na oshinakugwanithwa shokukwatela komeho omaihumbato gaakwashigwana mboka ye li kohi yomalelo gawo pamukalo ngoka gwa taambiwa ko kwaayehe.

Oya popi kutya manga etokolo inaali ningwa kOmpangu yoPombandambanda, okwa li tango kuna okukwatathanwa naakwashigwana pamukalo gu li nawa.

“Onkene nee omalelo gopamuthigululwakalo gomonooli oga tinda etokolo lya ningwa kOmpangu yoPombandambanda notaga indile opo omupresitente gwoshilongo shaNamibia e ekelehi etokolo ndyoka nokulombwele Ompangu yoPombandambanda yi talulule etokolo, kwi ikwatelelwa Okatendo 81 kEkotampango lyaNamibia.

“Mwaashoka, etokolo [lyomashenge] olya ya pambambo Okatendo 14 kEkotampango pakutala nkene tashi guma omalelo gopamuthigululwakalo,” osho omalelo gopamuthigululwakalo ga popi ngaaka.

Oshiwike sha zi ko, /Gâseb okwa popi tati: “Emanguluko lyoludhi ndoka halyo lya li momadhiladhilo getu sho twa kondjele emanguluko lyoshilongo shika.

Ngele otwe etha onkalo ndjoka inaayu uka moshigwana shetu, otashi ka piyaganeka mboka ya kanithila oomwenyo dhawo mekondjelomanguluko lyoshilongo shetu.”

Okwa popi kutya aaleli yopamuthigululwakalo otaya indile Aanamiia ayehe, Aafrica osho wo uuyuni awuhe wu waimine mokukondema oondjokana dhaantu yoludhi lumwe paukashikekookantu.