Omukuluntuwiliki gwondolopa yaGrootfontein, Kisco Sinvula, ngoka a adhika opo a shunwa miilonga mEtitano lya zi ko, okwa tidhwa miilonga sha landula oshigongi showina sha ningwa petameko lyoshiwike shika.
Moshigongi showina shoka sha ningwa mOmaandaha, ookansela yane melelo lyondolopa yaGrootfontein oya shaina uutokolitho mboka wa tokola etidho miilonga lyaSinvula.
Ookansela mboka oyo mayola gwondolopa Talitha Garises, omunashipundi gwokomitiye yelelo Elizabeth Kastoor osho wo ookansela yalwe Lodewikus Jacobs naJohanna Fillemon.
Ookansela yalwe yatatu mboka ya kalela po ongundu yoSwapo oya tindi okushaina uutokolitho wokutidha Sinvula miilonga.
“Okontalaka yiilonga yomukuluntuwiliki, omusamane Kisco Mbeha Sinvula oya hulithwa po meendelelo pautho lyeuvathano lyompango yo15.1.2 yeuvathano lyiilonga, lyomasiku 10 Maalitsa 2020,” osho ombapila yuutokolitho ya shangwa ngaaka.
Onzonkundanki oya popi kutya Sinvula ota ka pewa omukanda gwe gwelaleko miilonga mOmaandaha.
Melelo lyondolopa ndjoka otaku hokololwa ookansela yi itopola moongundu mbali.
Ongundu ndjoka tayi kondjitha Sinvula a tidhwe oya thikama po muGarises gwongundu yoSwapo, kansela Kastoor gwoPopular Democratic Movement (PDM), kansela gwo-Independent Patriots for Change (IPC) Jacobs osho wo kansela Fillemon.
Omanga ongundu onkwawo ndjoka ya gama kuSinvula noya hala kaatidhwe, oya thikama po kumayola omukulu Lovisa Iiyambo, kansela Alfeus Nghikevali osho wo kansela Victor Shandjuuka.
Ongundu ndjoka tayi yambidhidha Sinvula, oyi itaala kutya inayi halikila mo melelo lyaGrootfontein notayi dhengelwa konankondongolo omolwuukwamuhoko.
Onzonkundaneki ndjoka yi na owino kombinga yoshikumungu shomondolopa yaGrootfontein oya lombwele oThe Namibian kutya Sinvula ina halikila muuleli wondolopa molwashoka keshi omvalele yaGrootfontein.
“Oshinima shoka otashi hwahwamekwa kuukwamuhoko molwashoka naamboka kaayeli melelo lyondolopa ohaya kala taya kondjitha noku ula omalaka Sinvula kehe mpoka ye mu mono,” osho onzonkundaneki ya popi ngaaka.
ELOMBWELO LYOMPANGU
Sinvula opo ashike a adhika a shuna kiilonga mEtitano lya zi ko, sho a kala a kuthwa miilonga pakathimbo uule woomwedhi 14 sho ta tamanekelwa omaihumbato giilonga kaage li pamulandu.
Ompangu yoPombanda mOvenduka oya gandja elombwelo kutya Sinvula nashunwe miilonga pambelewa mEtitano, sha landula sho kwa li a kuthwa miilonga muMaalitsa, omumvo gwa zi ko.
Ompangu oya tala muule etokolo ndyoka kwa li lya ningwa kelelo lyondolopa yaGrootfontein okukutha miilonga Sinvula ponkatu ye yuukuluntuwiliki pakathimbo noya tokola oku mu shuna mo.
Sinvula okwa li a kuthwa miilonga pakathimbo ta tamanekelwa iikoya 27 ya kwatela mo okuya pambambo elelo lyondolopa, uukengeleledhi, oombumbo osho wo okutinda okuninga iigongi yelelo lyondolopa ngaashi tashi uthwa kOveta yOmalelo gOondolopa.
Sinvula otaku hokololwa wo kutya okwa li a shaina ekuto lyiilonga lyaaniilonga omanga inaaya mana ko omalolelo gawo giilonga guule woomwedhi hamano – naashoka okwe shi ningi anuwa shaali paveta.
Shoka okwa li sha hwahwameke aakalimo yamwe yomondolopa yaGrootfontein ya shangele omupresitente Hage Geingob ombapila taya tamanekele minista goondolopa nomapendulopo gokomikunda, Erastus Uutoni, okukala a ndopa okuyapukila uupyakadhi melelo lyondolopa yawo.
OLUGODHI
MEtiyali, Sinvula otaku hokololwa a dhenge omuniilonga pamwe melelo lyondolopa ndjoka, Patrick Tsibeb, sha landula oontamanana pokati kaSinvula nehe yaTsibeb.
Oshiningwanima shoka otaku hokololwa sha ningilwa pondingosho yi li moGrootfontein, komatango gEtiyali.
Tsibeb okwa koleke oshingwanima shoka nokwa hokolola kutya Sinvula okwe mu dhenge nongonyo momulungu omanga kwa li ta kambadhala oku ya hangukununa pethimbo ya yi mumwe natate gwe [gwaTsibeb].
Tsibeb oha longo melelo lyamuni gwaGrootfontein moshimpungu shiikwaminino.
Tsibeb okwa popi kutya manga oshiningwanima shoka inaashi ningwa, Sinvula okwa li a tamanana nahe shoka she eta yu umbathane omalaka ga honga.
“Onda li kiilonga, nomulongi ngoka ha longele kosikola haku sikola omumwandje okwa dhengele ndje kutya omukuluntuwiliki okuli pondingosho ta tuku tate gwandje. Sho ndayi ko, tate inandi mu adha ko. Onda pula kutya oshike sha ningwa po, nonda hingi ndiye kopolisi hoka nda adha tate,” osho a hokolola ngaaka.
Okwa gwedha po kutya kopolisi okwa zi ko nahe noye ya pondingosho mpoka pwa li Sinvula a kuutumba pamwe nakansela gwoshikandjohogololo shaGrooftontein, Elder Filipe.
“Sinvula natate oya tameke oku undulathana nonda kambadhala oku ya hangukununa. Kansela [Filipe] okwi igidha kutya nandi dhengwe, okuza mpoka Sinvula okwa dhenge ndje nongonyo momulungu,” osho a hokolola ngaaka.
Okwa hokolola kutya kali a hala okukondja nomuhona gwe, nonkene okwa tokola owala a ye koshipangelo.
Tsibeb otaku hokololwa a taambelwa moombete, uule woomwili ne.
Okwa lombwele onzonkundaneki ndjika kutya omulungu gwe ogwa zinda noonkondo, oku na okupatululila Sinvula oshipotha.
Sinvula naFilipe inaya yamukula komapulo ya pulwa kombinga yoshiningwanima shoka.
