Views: 16
ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីបារាំងលោក អេមម៉ានុយអែល ម៉ាក្រុង បាននិយាយកាលពីថ្ងៃពុធថា ការលុកលុយជើងគោករបស់អ៊ីស្រាអែល “ទ្រង់ទ្រាយធំ” ចូលតំបន់ហ្កាហ្សា នឹងក្លាយជា “កំហុស” ដោយព្រមានថា វានឹងធ្វើឱ្យប៉ះពាល់ដល់ជនស៊ីវិល ហើយវាមិនធានាសន្តិសុខរយៈពេលវែងរបស់អ៊ីស្រាអែលបានទេ។
ការព្រមាននេះបានកើតឡើងខណៈលោកម៉ាក្រុងធ្វើកិច្ចពិភាក្សានៅទីក្រុងគែរជាមួយសមភាគីអេហ្ស៊ីបលោក អាប់ឌែល ហ្វាតា អាល់-ស៊ីស៊ី (Abdel Fattah al-Sisi) ដែលបានជំរុញកិច្ចខិតខំប្រឹងប្រែង “ដើម្បីបញ្ចៀសការឈ្លានពានជើងគោក” នៅតំបន់ហ្កាហ្សា ជាកន្លែងដែលអ៊ីស្រាអែលកំពុងជាប់ក្នុងការប្រឈមមុខដាក់គ្នាយ៉ាងសាហាវជាមួយពួកសកម្មប្រយុទ្ធហាម៉ាស។
ក្រុមមន្ត្រីបាននិយាយថា អ៊ីស្រាអែលបាននិងកំពុងទម្លាក់គ្រាប់បែកលើដែនដីប៉ាឡេស្ទីនដ៏តូចនេះ ចាប់តាំងពីថ្ងៃទី ៧ ខែតុលា បន្ទាប់ពីពេលដែលខ្មាន់កាំភ្លើងក្រុមហាម៉ាសបានឆ្លងកាត់ព្រំដែនរបស់ខ្លួន ដោយសម្លាប់មនុស្សជាង ១.៤០០ នាក់ ភាគច្រើនជាជនស៊ីវិល និង បានចាប់មនុស្សជាង ២២០ នាក់ផ្សេងទៀត នៅក្នុងការវាយប្រហារដ៏អាក្រក់បំផុតក្នុងប្រវត្តិសាស្ត្ររបស់អ៊ីស្រាអែល។
ក្រុមមន្ត្រីហាម៉ាសនិយាយថា រហូតមកទល់ពេលនេះ ការវាយប្រហាររបស់អ៊ីស្រាអែលបានសម្លាប់ប្រជាជនប៉ាឡេស្ទីនជាង ៦.៥០០នាក់ ដែលភាគច្រើនជាជនស៊ីវិល។ មានការបារម្ភថាចំនួនអ្នកស្លាប់អាចកើនឡើងបន្ថែមទៀត ប្រសិនបើអ៊ីស្រាអែលបន្តជំរុញការលុកលុយជើងគោកដែលគេរំពឹងទុកយ៉ាងទូលំទូលាយក្នុងការប្រឹងប្រែងដើម្បីបំផ្លាញក្រុមហាម៉ាសនិងជួយសង្គ្រោះចំណាប់ខ្មាំង។
លោកម៉ាក្រុងបាននិយាយបន្ទាប់ពីជួបជាមួយលោកស៊ីស៊ីដែលបានព្រមានដែរថាប្រតិបត្តិការជើងគោកនឹងបណ្តាលឱ្យមាន “ជនស៊ីវិលស្លាប់និងរបួសជាច្រើននាក់” យ៉ាងដូច្នេះថា “អន្តរាគមន៍ទ្រង់ទ្រាយធំ ដែលនឹងធ្វើឱ្យជីវិតជនស៊ីវិលប្រឈមនឹងហានិភ័យ គឺជាកំហុស។”
មេដឹកនាំបារាំងបាននិយាយថា “វាក៏ជាកំហុសមួយសម្រាប់អ៊ីស្រាអែលផងដែរ ព្រោះវាទំនងជាមិនផ្តល់ការការពាររយៈពេលវែង និងដោយសារតែវាមិនស៊ីគ្នានឹងការការពារប្រជាជនស៊ីវិលឬការគោរពច្បាប់មនុស្សធម៌អន្តរជាតិនិងច្បាប់សង្គ្រាម។”
អេហ្ស៊ីបនិងហ្ស៊កដានីគឺជារដ្ឋអារ៉ាប់ពីរដំបូងគេដែលបង្កើតទំនាក់ទំនងជាមួយអ៊ីស្រាអែលក្នុងឆ្នាំ ១៩៧៩ និង ១៩៩៤ ហើយចាប់តាំងពីពេលនោះមកបានដើរតួជាអ្នកសម្រុះសម្រួលដ៏សំខាន់។
រដ្ឋាភិបាលក្រុងគែរគឺជាអ្នកសម្របសម្រួលដ៏សំខាន់មួយក្នុងកិច្ចខិតខំប្រឹងប្រែងដើម្បីទទួលបានការដោះលែងចំណាប់ខ្មាំងជាង ២០០ នាក់ដែលឥឡូវកំពុងជាប់ឃុំនៅហ្គាហ្សា។
បន្ទាប់ពីការទម្លាក់គ្រាប់បែកនិងការហ៊ុមព័ទ្ធដោយអ៊ីស្រាអែលអស់រយៈពេលជាងពីរសប្តាហ៍ ប្រព័ន្ធថែទាំសុខភាពដែលផុយស្រួយរួចទៅហើយរបស់ហ្កាហ្សាប្រឈមនឹងហានិភ័យនៃការដួលរលំ ដោយមន្ទីរពេទ្យជិតអស់ការផ្គត់ផ្គង់ និងប្រេងឥន្ធនៈសម្រាប់ម៉ាស៊ីនភ្លើង៕
លោកម៉ាក្រុង (ឆ្វេង) ជួបលោកស៊ីស៊ីក្នុងទីក្រុងគែរកាលពីថ្ងៃពុធ