MASERU
Moqebelo o fetileng, BAM Group Foundation (BGF) e bile le kopano ea pele ea bacha ba metse ea Lithoteng ka har’a setereke sa Maseru.
Sepheo sa kopano ena e ne e le ho thakhola kholiso ea bacha le ho ba lemosa litlolo tsa molao tse ba amang. Phuthehong ena, ho bile teng Morena oa sebaka, bathehi ba BGF, litho tsa mokhatlo oa International Police Association (IPA) ho hlaha SOU/SSU Ha Mabote, le bacha ba metse ea Lithoteng ka ho fapana.
Ea emeng e le motsamaisi oa mokhatlo (President) Mofumahali Mamashiya Ntšepeng Tšita-Tikiso o hlalositse ha sepheo sa BGF Youth e le ho thusa bacha ho itlhabolla ka ho nchafatsa lerato la bochaba, lipapali le metjeko. Ho phethahatsa sena, nakong ea khefutso ea likolo, ho tla ba le litlholisano tsa bacha ho hlaha metseng ea Lithoteng, ho akarelletsa bolo ea maoto, metjeko le papatso ea litalenta.
Moalosi e moholo oa BGF (Chief Ambassador) Mofumahali Tšepang Tšita-Mosena o elelitse bacha ho ela hloko liqholotso tsa moo ba phelang teng, le ho ba le sepheho ho li fetola, e le hore Lithoteng a matlafale joaloka libaka tse ling ka har’a naha.
Ho tsoa mokhatlong oa IPA Molula-setulo oa SOU-SSU Monghali Setleli o hlahlelletse bacha ka malebela khahlanong le tšebeliso ea lithethefatsi. O hlalositse ka matla mekhoa eo lithetefatsi li fihlang ho bacha, mabaka ao batho ba fanang ka tsona, le hore ba qobe ho ba haufi le basebelisi ba lithethefatsi ka litsela tsohle. A re bacha ba tlalehe liketso tse belaetsang ho batsoali le sepolesa se haufi. A boela a ba elellisoa ka thekiso ea litho tsa ‘mele le ho koeteloa hoa bacha ho ea etsoa makhoba linaheng tse hole.
Mofumahali Matekane ho hlaha IPA o khothalelitse bacha ho rapela ba le ho rata Morena Molimo ka ho hlompha melao ea hae. A tsoela-pele hore bana ba hlomphe batsoali ka nako eohle, ba ithute, e le ho qoba liketso tse ka ba kenyang teronkong. Ha a hlalosa litokelo tsa batsoali le bana, Matekane o tobokelitse tlhekefetso ea motamo haholo a bontša bohlokoa ba tlhomphano lipakeng tsa batsoali, baruti le matichere ho bona e le bana. A boela a khothalletsa bana ho tlaleha ka bokapi liketso tsa tlhekefetso ea mefuta eohle.
Monghali Makhahlela eena ho tsoa IPA, o hlalositse bophelo ba teronko le mekhoa le liketso tsa manomoro. Sepheo e le ho khalema liketso tse ka khelosang bana bophelong bo nepahetseng. A khalema batsoali ho emisa ho etsa liketso tse ka hohelang bacha ho kena litlolong tsa molao hoba thuto e ntle e lokela ho hlaha ka lapeng.
Kopanong ena, bacha ba abetsoe limpho tsa liaparo ho tsoa BGF, ba fuoa monyetla oa ho beha litaba-tabelo tsa bona ka sebaka sa Lithoteng le ho hlahisa maikutlo a ho rarolla liqholotso tsa bona.
Morena oa sebaka Ntate Kele o lebohetse bacha haholo, a bontsa thabo ka kopano e tlisang phethoho ka hare ho tikoloho ea Lithoteng.
