Opolisi oya lopota aalumentu yatatu mboka kwa hokololwa yi imangeleke moondolopa dha yooloka, mOutapi, mOmuthiya osho wo mOnethindi.
Otaku hokololwa kutya olutu lwaAlbertus Mandi Natangwe (21), olwi itsuwika mondunda ye momukunda Omikwayanghwii momudhingoloko gwOutapi, koongulasha dhEtitano. Otaku hokololwa kutya Natangwe okwi itsuwika kukuume ke ngoka kwa li haya zi naye megumbo limwe.
Pokati mpoka, Simon Alfeus gwomimvo 35, otaku fekelwa i imangeleke momukunda Okawambi B mOmuthiya sho olutu lwe lwi itsuwika mepya, sha ningwa mEtitano. Otaku hokololwa kutya omudhimba gwa nakusa Alfeus ogwi itsuwika komukwashigwana.
Omukwashigwana gwa Angola, Manuel Domingu (26), okwi itsuwika i imangelekela mondunda ye momukunda Onekaku ngoka tagu adhika mOnethindi, moshitopolwa shaShikoto. Otaku hokololwa kutya ohondakadhina ye oyo ye mu itsu i mangelekela mondunda ye, ashike nando ongaaka nakusa ina thiga ko ombapila yetompelo lyeikuthomwenyo.
Aapambele yoonakusa ya tumbulwa metetekelo oya tseyithilwa nale oonkundana dhomaluhodhi nomakonakono gopolisi otaga pula komeho.
Pokati mpoka, kamatyona gwomimvo 19 okwa mana oondjenda moKaribib sho taku hokololwa a dhengwa kolwaadhi. Nakusa Bradley Nowose okwa li nomupambele taya ningi nawa iipeleki ya londa pombanda sho omvula ya tameke okuloka nokwa zi olwaadhi oludhigu.
Olwaadhi ndoka otaku hokololwa lweya dhenge, noya gu ko kombanda yiipeleki shoka she eta Nowose i idhenge po omutse pevi. Okwa falwa mbala kokapangelo kaKaribib hokwa lwanima a manene oondjenda. Aapambele ye oya tseyithilwa nale onkundana yoluhodhi nomakonakono gopolisi otaga pula komeho.
Molukanda lwoombashu lwaMix popepi nOvenduka, aanona yatatu oya mana oondjenda sho ya pile mombashu pethimbo ya adhika ya kotha.
Oonakusa otaku hokololwa kutya uumatyona uyali gumwe oku na omimvo heyali nomukwawo oku na omimvo ntano, omanga nakusa omutitatu omukadhona gwomimvo mbali. Oshe etithi shomulilo inashi tseyika natango. Omakonakono gopolisi otaga tsikile.
OMAKWATONKONGA
Onkundana onkwawo yoluhodhi, omulumentu gwomimvo 24 okwa tulwa miipandeko ta tamanekelwa edhipago lyaGerome Helgrian (41), ngoka taku hokololwa a kwatwonkonga, a yugwa nokudhipagwa, sha ningilwa moLüderitz omasiku ga zi ko.
Pauyelele wopolisi otaku hokololwa nakusa okwa tsuwa noshilwitho kaashishiwike, lwiikando ya konda po40 molutu lwe.
Okwa yugwa wo ongodhi ye yopeke noTV.
Komanda gwopolisi yoshitopolwa sha||Kharas, komufala Marius Katamila, okwa popi kutya opolisi oya lopotelwa oshiningwanima shomulumentu ngoka a kana, sha landula sho a monika lwa hugunina momasiku 16 Septemba.
“Omweelo gwondunda ye ogwa adhika gwa teka nogwa patuluka, nokwa adhika a lala pevi popepi nombete, e na iilalo oyindji a tsuwa. Okwa kolekwa a mana oondjenda sho a thikithwa moshipangel shepangelo shaLüderitz,” osho Katamila a popi ngaaka.
Katamila okwa popi kutya oshipotha shedhipago, eyugo, neteyo lyegumbo nelalakano lyokuyaka osho wo ekwatonkonga osha patululwa nopolisi.
“Omufekelwa okwa tulwa nale miipandeko nokwa holoka mompangu yamangestrata gwaLüderitz mOmaandaha,” osho Katamila a popi ngaaka.
Omakonakono gopolisi otaga pula komeho.
Pokati mpoka, aakiintu yatatu oya kwatwonkonga mehuliloshiwike lya piti, sha ningilwa moMururani, moKatutura osho wo mOpuwo.
Momukunda Omururani, omulumentu gwomimvo 28 otaku hokololwa a kwatonkonga okanona komimvo ne, sho taku hokololwa e ka hekele miihwa. Omufekelwa okwa tulwa nale miipandeko.
Moshiningwanima shilwe, omufekelwa gwomimvo 15 okwa tulwa miipandeko moKatutura, mOvenduka sho taku hokololwa a kwatonkonga kakadhona gwomimvo ne.
Otaku hokololwa kutya nakuninga oshihakanwa nomufekelwa okwa li haya zi megumbo limwe, nomufekelwa okwa holoka ohela mompangu yamangestrata.
Omukiintu gwomimvo 27 okwa kwatwonkonga mEtitano komufekelwa keeshiwike sho taku hokolwa e mu kwata noku mu hilila miihwa yi li momulamba, sha ningwa momudhingoloko gwaRutjandja mOpuwo.
Omakonakono gopolisi otaga pula komeho.
