Ondjayi yetanga lyopolisi moshilongo Joseph Shikongo okwa gandja elondodho kaapolisi naatamaneki mboka ye na ‘onyalo’ mokulonga iilonga yawo nohaya kala olundji yi itaalela taya ipe oombedhi uuna pwa kana epeko lyoshipotha shontumba.
Okwa popi kutya onkalo ndjoka olundji ohayi eta iipotha yomoompangu yi katekwe.
“Onkene to adha aapolisi naatameneki mboka ye na onyalo, taye ku lombwele kutya epeko olyi li kopolisi, omanga opolisi otayi popi kutya epeko olyi li kompangu. Iinima yoludhi ndoka nayi hulithwepo” osho a popi ngaaka.
Shikongo okwa popi kutya iikondo yopolisi oya pumbwa okukala tayi longele oshigwana paufipipiko nopaushili.
“Mopolisi yaNamibia, otwa shangitha mo iipotha yaapolisi yaananyalo sho epeko okwa li lya kana nenge kaali wetike, noye ya taya popi kutya otaya dhimbulukwa kutya opu na oshipotha,” osho a popi ngaaka.
Pauyelele waShikongo, epeko ndyoka okwa li lya tuminwa komupolisi omimvo dha piti, ashike omupolisi ngoka okwa kala nokupopya kutya epeko ndyoka olyi li kOmbelewa yOmutamanekindjayi.
“Esiku limwe otwa popi kutya natuye tu ka konge epeko ndyoka. Nepeko ndyoka otwe li adha naye. Iinima mbyoka oyo tatu popi. Otashi vulika mu na omapeko galwe ngoka kaage wetike noge li owala moka,” osho a popi ngaaka.
Okwa popi kutya iiningwanima yoludhi ndoka ohayi eta ongeyo nokwaambilipalelwa koshigwana kombinga yiilonga tayi longwa kopolisi.
OSHIGONGIILONGA
Shikongo ndhoka okwe dhi popi pethimbo lyoshigongiilonga shomasiku gatano shoka sha ningilwa mOswakopo oshiwike shika.
Oshigongiilonga shoka osha li kombinga yaapolisi naatamaneki.
Shikongo okwi indile aapolisi ya hwepopeke egandjo lyomayakulo pakutala iilonga yawo mbyoka taya longo.
Gulwe ngoka a popi poshigongiilonga shoka, omutamanekindjayi Martha Imalwa ngoka a popi kutya monakuziwa, aatamaneki okwa li ya tulwa miipandeko omolwiiningwanima yi na sha nomayako, omateyo gomagumbo osho wo uukengeleledhi nuulingilingi.
“Mongashingeyi, otatu popi kombinga yiimbuluma mbyoka tayi hokola, nonda hala aatamaneki ya ndhindhilike kutya Namibia oshilongo shoka sha simanekwa paigwana muuyuni. Ngele itamu kondjitha iimbuluma nena kapu na ngoka ta ka kala a hala okuya koshilongo shetu,” osho a popi ngaaka.
Hahendendjayi Festus Mbandeka okwa popi kutya opu na iipotha yiihulo nomahepeko ga pamba uukwashikekookantu tayi ningilwa aakiintu naanona mbyoka ngashingeyi yi igalala moshilongo.
Okwa popi kutya iipotha yoludhi ndoka otayi pumbwa okuningilwa omakonakono gomuule osho wo uumbangi wa kola opo ku shilipalekwe kutya omufekelwa okwa monika ondjo shi li mondjila.
“Onkene otwa pumbwa elongelokumwe lyi li nawa pokati kiikondo yekalekopo lyooveta,” osho Mbandeka a popi ngaaka.
