Oomwa ntano ndhoka taku hokololwa dha ponokele omukeeleli gwomaliko, ngoka lwanima a manene oondjenda moshipangelo shaShakati, mOsoondaha, odha dhipagwa po ohela kopolisi.
Omupopiliko gwopolisi yaShana, inspekta Thomas Aiyambo okwa koleke onkundana ndjoka nokwa popi kutya nakusa okwa li a taambelwa moombete nokwa li kokoma pethimbo a hulitha.
Nakusa okwa hololwa kutya oye Ruben Abraham (44), a yambukile komukunda Oshikondiilongo moshitopolwa shaHangwena.
“Okwa li a lika noonkondo momutse,” osho Aiyambo a popi ngaaka.
Okwa gwedhapo kutya oombwa ndhoka odhomunangeshefa gwomOshakati.
Otaku hokololwa kutya oombwa odha ponokele Abraham konima sho dha dhawa nokuza mo molugumbo.
“Otaku ka katukwa onkatu uuna kwa ningwa oonkundathana naakuthimbinga. Kapu na ngoka a tulwa miipandeko sigo oompaka,” osho Aiyambo a popi ngaaka.
Abraham otaku hokololwa a ponokelwa pethimbo a li mela lyondjila u uka kegumbo okuza kiilonga.
Omuniilonga pamwe naAbraham, ngoka a tindi edhina lye li tumbulwe, okwa lombwele onzonkundaneki ndjika kutya oshiningwanima shoka osha ningwa mOsoondaha ethimbo lyongula lwopotundi 06h00.
“Okwa li kwa luudha natango pethimbo nda tsakanene naye u uka kegumbo. Sho nda thiki kiilonga, ondu uvu omuntu ta kugu, ashike kanda li lela ndi na nasho, molwashoka okwa li ndishi pamwe ewi otali zi mongodhi yomuniilonga pamwe gulwe,” osho a hokolola ngaaka.
Ashike sho a mono ekudhilo lyomuntu ta kugu lya tsikile, okwa thikama nokuninga omakonakono gaashoka tashi inyenge momudhingoloko ashike nando ongaaka petameko okwa li nuumbanda wokuya hoka taku zi ekudhilo, molwashoka okwa li oye awike.
Okwa popi kutya lwanima okwa tokola e ende u uka hoka taku zi oonkugo, nokwa mono omuntu a lala pevi, ashike pethimbo ndyoka ina dhimbulula kutya ngoka a li ta lika oAbraham.
“Okwa li nda tila molwashoka okwa li ndishi pamwe okwa hangenwa kaantu, nokwa li nda tila kutya ngele onda hedha popepi nangame otandi ningwa oshihakanwa,” osho a popi ngaaka.
Okwa hokolola kutya okwa tsakanene naaniilonga yehangano lilwe lyuusekuliti noya tokola ayehe ya ye poshingwanima shoka.
Okwa hokolola kutya oshinima shotango a dhimbulula ondjato, nopethimbo ndyoka kali nande a dhimbulula ngele pamwe omuntu ngoka ta vunyagulwa koombwa, omuniilonga pamwe molwashoka pethimbo ndyoka okwa li e li omudhulungu.
Oombwa ndhoka otaku hokololwa dha hangene Abraham nodhe mu hula iikutu noku mu lya olutu aluhe.
“Sho nda tsakanene naye tayi kegumbo okwa li a zala okandjatha kiilonga kokombanda, ombindja osho wo omuzalo gwiilonga, ashike sho twa adha ta ponokelwa koombwa okwa li e li omudhulungu, onkene inandi mu dhimbulula mbala. Okwa lika noonkondo koombwa ndhoka, unene tuu kombunda nokomakutsi,” osho a popi ngaaka.
Omuniilonga gulwe guusekuliti, Simon Jafet (25), okwa popi kutya naye koongulasha dhOmaandaha okwa ponokelwa koombwa odho tuu ndhoka pethimbo a li mela lyondjila u uka kegumbo.
Omukuluntu gwehangano lyoRubicon Security moshitayi shaShakati, Michael Bingham, hoka oko kwa li haku longo nakusa Abraham okwa popi kutya oyu uvithwa nayi koshiningwanima shoka nokwa tongonona Abraham ongomuniilonga omwaanawa.
“Otandi ka ya kopolisi, molwashoka oombwa dholudhi ndoka inadhi pumbwa okwe ethelwa momapandaanda. Ruben okwa li omukeeleli gwomaliko omwaanawa. Oshinima shoka inandi shi nyanyukilwa nande,” osho a popi ngaaka.
Okwa gwedhapo kutya otaya ka patululila mwene gwoombwa ndhoka oshipotha shedhipago.
Pethimbo oombwa ndhoka dha dhipagwa ohela, aanambelewa yuuhaku wiinamwenyo oya kutha ko iikonakonwa koombwa ndhoka opo ku ka ningwe omakonakono gomuule ngele oombwa ndhoka odha li ngaa monkalo yi li nawa paundjolowele.
