“Okwali li natango e li mokati kombinzi. Onda kambadhala ndi mu kwathele sho nde mu tanauna, ashike nani pethimbo ndyoka okwa hulitha nale. Okwa hulithile momake gandje.”
Mbyoka oyo iitya nomatumbulo gaNdateelela Nghipandulwa, ngoka oye mumwayina gwaRuben Abraham (44) ngoka a mana oondjenda mokoma yoshipangelo shaShakati konima sho a ponokelwa nokulika koombwa ntano mOsoondaha.
Opolisi oya popi kutya oombwa ndhoka odhomunangeshefa gwomOshakati.
Oombwa ndhoka otaku hokololwa dha thawa molugumbo nokuponokela Abraham pethimbo a li mela lyondjila okuya kegumbo ta zi kiilonga ethimbo lyongula.
Nakusa Abraham otaku hokololwa kwa li ha longele ehangano lyuusekuliti.
Nghipandulwa okwa kutya onkundana ndjoka okwe yi lombwelwa pethimbo a li ti ilongekidha okuya kefumvika lyokanona ka kuume ke.
“Onda yakula ongodhi okuza komukwanezimo ngoka a tseyithile ndje kutya mumwameme okuli moombete sha landula sho e ehamekwa noonkondo koombwa ndhoka dhe mu ponokele,” osho a popi ngaaka. Okwa gwedha po kutya onkundana ndjoka okwa li ye mu halutha noonkondo.
“Ndjoka oyo onkundana ombwinayi kaaku na we nda tsakaneka numvo, yamumwameme ngoka a mana oondjenda sho a lika koombwa.
Okwa sa eso tali lulumike, noshu uvitha ndje nayi,” osho a popi ngaaka. Okwa gwedha po kutya moshipangelo aapangi okwa li ya kambadhala mpoka taya vulu opo ye mu hupithe ashike oya hulile muunyengwi.
“Sho ndayi mondunda ye yomoshipangelo, onde mu adha e li muuwehame nokwa lombwele ndje yemwene kutya ote ehamenene. Pethimbo ndyoka okwa li a mangwa molutu aluhe, molwashoka oshipa okwa li sha togonyonwa ko nokwa li tazi ombinzi kehe pamwe,” osho a popi ngaaka.
“Onde mu adha mondombe yombinzi ishewe kapwa li ndohotola, nonda pula aapangi kutya omolwashike kwa li owala ya tala mumwameme tazi ombinzi kehe pamwe peha lyoku mu kwathela, noye mu tula owala komakende gomeya,” osho a popi ngaaka.
Nghipandulwa okwa popi kutya Abraham okwa li ta fudha nuudhigu.
Konima yethimbo, okwa popi kutya omupangi ngoka a li po omukuluntu okwe mu lombwele kutya okwa dhengela ndohotola, ashike onkene inaa thika mbala.
“Onda kala nde mu kwata omanga a kundukidhwa kaakwanezimo yetu, nolwanima aakwanezimo oya zi mo ya ka patululile mwene gwoombwa oshipotha kopolisi. Nonande okwa li tandi popi namumwameme kali nande niifudho yi li nawa. Lwanima okwa mwena okupopya,” osho a popi ngaaka.
“Ondi ithana aapangi nondeya indile ya kwathele mumwameme. Ondeya pula ye mu tule keshina lyomupepo gwiifudho opo yi mu yambidhidhe mokufudha.
Okuza mpoka onda kambadhala oku mu kwathela a tanauke, ashike nani okwa hulitha nale. Okwa hulithile momake gandje,” osho Nghipandulwa a popi ngaaka.
“Okwa li e ehamekwa noonkondo koombwa ndhoka, unene tuu komaako. Iipa ye okwa li ya togonyonwa ko, nokwa li a kwalwagulwa. Omakutsi ge oga adhika ga tokolwa ko, nokwa li noombululu mothingo,” osho a hokolola ngaaka.
Nghipandulwa okwa popi kutya Abraham okwe mu lombwele kutya manga e li molugodhi noombwa, okwa sholola, nokwi isitha nokuza mpoka opo ashike oombwa ndhoka dhe mu etha.
Omukuluntu moshipangelo shaShakati, Ruben Kanime, okwa lombwele onzonkundaneki ndjika kutya ita vulu okutya ko sha ngele opwa dhanwa uuhasha mokukwathela Abraham sho a taambelwa moombete, nokwa popi kutya okwa li natango a tegelela olopota kombinga yoshiningwanima shoka.
“Opo owala tandi vulu okupopya ngele pamwe opwa dhanwa uuhasha nenge hasho, ashike omapopyo okuza kaakwanezimo kutya oye wete pwa longwa uuhasha onde ga uva okuza kaakwanezimo,” osho a popi ngaaka.
‘OTWE MU KANITHA SIGO ALUHE’
Nghipandulwa okwa popi kutya Abraham okwa li omuntu omwaanawa.
“Okwa li hetu kwathele ongaakwanezimo, unene tuu meme gwe osho wo oyana yaali. Otwa kanitha omuntu omwaanawa sigo aluhe. Onkene tatu kongo uuyuuki wu longwe moshiningwanima sha mumwameme, noshipotha shoka oshi li momake gopolisi ngashingeyi,” osho a popi ngaaka.
Aakwanezimo oya popi kutya oya thaneka okufutitha omunangeshefa ngoka gwoombwa sho a kala inaa shilipaleka kutya oombwa dhe odha kalekwa molugumbo opo kaadhi mone uupitilo wokuponokela aantu momapandaanda. Nghipandulwa okwa popi kutya oku uvithwa nayi noonkondo molwashoka mwene gwoombwa ina ninga nokuli nonkambadhala ya sha okutalela po Abraham sho a taambelwa moombete.
“Ina ulika nande olukeno lwa sha nositola ye oya kala owala ya patuluka ta longo iimaliwa ye. Manga mumwameme inaa hulitha, okwa hokololele oondohotola ashihe sha ningwa po, molwashoka okwa li ta vulu okupopya,” osho a popi ngaaka.
‘OSHIMALIWA SHEFUMVIKO’
Mumwayinagona gwaAbraham, Albertina Nghipandulwa, okwa popi kutya aakwanezimo oya hala mwene gwoombwa oye a gandje oshimaliwa shomalongekidho gefumviko.
Nghipandulwa okwa popi kutya manga Abraham e li moombete, okwa tseyithile aakwanezimo ashihe shoka sha ningwa po pethimbo a ponokelwa koombwa.
“Okwa hokolola kutya okwa li ta kondjo noombwa ndhoka, ashike odhe mu tono oonkondo. Okwa popi kutya oombwa ndhoka okwa li tadhi kambadhala oku mu ponokela komulungu. Okwi isitha, okuza mpoka opo nee oombwa ndhoka dhe mu etha. Ando shoka okwa li ineeshi ninga ando opo owala dhe mu dhipagele mpoka,” osho Nghipandulwa a hokolola ngaaka.
Aakwanezimo yanakusa ye li puyaheyali oya tsakanene nopolisi poshitaashi shopolisi yaShakati, ongulohi yOsoondaha.
Aakwanezimo okwa li ya pula opo mwene gwoombwa ndhoka a tulwe miipandeko.
NAKUNINGA OSHIHAKANWA OMUTIYALI
Simon Jafet (25) ngoka naye ha longo muusekuliti mOshakati, okwa ponokelwa koombwa ndatu ethimbo lyongula mOmaandaha, pethimbo naye a li mela lyondjila u uka kiilonga.
Okwa hokololele aatoolinkundana kutya omanga e li mondjila a thinda kegumbo okwa tsakanekwa koombwa ndatu ndhoka dheya kuye tadhi matuka nokwa tokola a kuthe mo ondjembo ye.
“Ondi ihata po nombwa yimwe oya kwata ndje metundji. Okwa li nda tila noonkondo molwashoka oshingwanima shoka osha ningwa miipathi yeho. Manga tandi kondjo noombwa ndhoka, onde shi pondola oku umba ko oshikuti shimwe, noombwa ndhoka odhe etha ndje nokufadhukapo,” osho Jafet a popi ngaaka.
Lwanima okwa falwa meendelelo koshipangelo shaShakati opo a ka mone uuhaku.
Ehangano lyokugamenena po iinamwenyo lyedhina Society for the Prevention of Cruelty to Animals (SPCA) moshitopolwa shaShana, mOsoondaha olya shanga komalungula kutya aakwashigwana naya kale haya ningi omapekapeko goludhi lwoombwa ndhoka tadhi opalele okukalekwa momagumbo.
“Oombwa nadhi pewe iikulya ya gwana ishewe nadhi dheulwe opo kaadhi ponokele aantu shila oongele dha sagelwa omuntu, ngashingeyi oombwa otadhi mono iihuna omolwuuhasha waantu,” osho ya shanga ngaaka.
ELOMBWELO
Sha landula oshiningwanima shoka, elelo lyondolopa yaShakati olya gandja elombwelo kaakalimo kaaya kale we noombwa dha konda pumbali, shila oongele omuntu ngoka a pewa omukandapitikilo gowina.
Shoka osha popiwa okupitila momukanda gwiikundaneki ngoka gwa pitithwa komupopiliko gwondolopa ndjoka, Katarina Kamari.
“Oombwa adhihe inadhi kalekwe momalugumbo, ishewe ngele odhi li mokati kaantu nadhi kale dha kwatwa nawa nodha tulwa ongodhi mothingo,” osho a popi ngaaka.
Okwi indile wo aakalimo ya shilipaleke kutya oombwa dhawo odha tuntilwa ishewe nadhi kale dha pewa omikanda dhoombwa okuza kelelo lyondolopa.
Kamari okwa popi kutya elelo lyondolopa olya kutha ko oongaku okushilipaleka kutya olya katuka oonkatu tadhi opalele opo iiningwanima yaantu taya ponokelwa koombwa yi hulithwe po.
Okwa popi kutya oonkatu ndhoka odha kwatela mo wo okuninga iikonga yelongo moshigwana kombinga yokukwatela po oombwa dhawo osho wo okushilipaleka kutha odha kalekwa megameno opo kaadhi monitha aantu oshiponga.
