Aakalimo yomomukunda Onatshiku moshikandjohogololo shaKatana moshitopolwa shaShana oya tungitha osaala yiinyangadhalwa yawo noshimaliwa shoka sha gongelwa okuza miifuta yaamboka taya kutha omavi pehala lyomalambo tali adhika momukunda gwawo.
Olundji omalambo ngoka ohaga kuthwa oondumba dhomavi ngoka haga longithwa kaanangeshefa yokutunga omatungo osho wo okuninga oondhopi.
Aakalimo yomomukunda gwa tumbulwa pombanda okwa li ya zimine opo ehala lyontumba ndyoka lya tothwa mo, li kale tali kuthwa omavi kondando yontumba, noshimaliwa shoka osha kala tashi gongelwa.
Shoka osha ningwa kohi yeziminino lyelelo lyopamuthigululwakalo lyUukwambi moka tamu adhika omukunda ngoka.
Meme Juta Nakulwa, ngoka oye omutakamithi gwomalambo gomavi mOnatshiku, okwa popi kutya elelo lyopamuthigululwakalo lyUukwambi okwa li lya pewa omukandapitikilo gwomudhingoloko okuza kUuministili wOmidhingoloko, Omakuti nOmatalelopo opo ya vule okukutha omavi pehala lyontumba.
Euvathano kwa li lya tulwa po oondyoka kutya mboka ya hala omavi ohaya ishangitha nuuna taya ile ko omavi aluhe ohaya yalulwa oondumba ndhoka ya kutha nohaye dhi futu kelelo lyopamuthigululwakalo.
Onkene aakalimo yomOnatshiku okwa li ya toto po okambo kombaanga komukunda hoka ya kala taya tsilike oshimaliwa tashi zi momalambo gomavi.
Nakulwa okwa popi kutya uuna gumwe gwomomukunda a pumbwa evi lyokutunga, oha pewa ondumba yotango oshali, nuuwanawa mboka ohawu pewa owala aakalimo molwashoka omalambo ngoka oge li momukunda gwawo.
“Onkene, pamukalo ngoka kehe gumwe okwa mona ko sha,” osho a popi ngaaka.
Nakulwa okwa popi kutya omasiku ga zi ko oye shi pondola okutunga po osaala yaakwashigwana ndjoka ya tungwa po nokashona kazi miifuta yomalambo gomavi.
Okwa popi kutya osaala ndjoka otayi kala metonatelo lyokomitiye yomukunda, notayi kala tayi longithwa miinyangadhalwa yaakwashigwana mwa kwatelwa iigongi osho wo iituthi ngaashi yoohango.
“Osaala oya pwa nale okutungwa. Oya pumbwa owala okukolongwa kombanda,” osho Nakulwa a popi ngaaka.
OONTAMANANA DHOMALAMBO GOMAVI
Muule woomvula dha piti miikundaneki omwa kala tamu lopotwa kombinga yomananathano pokati kaanamikunda naanangeshefa kombinga yomalambo gomavi, nokuli gamwe oga kala taga totwa po shaali papitikilo lyuuministili womidhingoloko.
Omukuluntu guuministili womidhingoloko mOngwediva, Laimi Erckie, okwa popi kutya uuministili okwa li wa hulitha po ekutho lyomavi momalambo taga adhika momudhingoloko gwIiheke ya Nakale moshitopolwa shaShana.
Mo2021, komufala gwOmidhingoloko Timotheus Mufeti okwa gandja elombwelo kelelo lyopamuthigululwakalo lyaNdonga opo iilonga ayihe ya pamba efulo lyomalambo gomavi momukunda Ondando – popepi nondolopa yaNiipa moshitopolwa shaShikoto – yi hulithwe po molwashoka okwa li tashi ningwa shaali pamulandu.
Shoka osha landula sho aanamukunda mOndando kwa li yi ikuthile oveta momake nokutula omainda mondjila ndjoka yu uka komalambo gomavi taya popi kutya inapu ningwa omakonaakono, omapekaapeko osho wo oonkundathana naanamukunda ngele otaya pitike ngaa momukunda gwawo mu ningwe omalambo gomavi.
Aanangeshefa mboka ya kala taya fulu omalambo gomavi mOndando omwa kwatelwa Otto Niimboto, Petrus Shambo osho wo mayola gwaNdangwa, Paavo Amwele.
Mo2021, ehangano lyedhina Otesa Civil Engineering, olya futithwa egeelo lyoo-N$300 000 kelelo lyopamuthigululwakalo lyOukwanyama sho lya kala tali fulu omalambo gomavi shaa li paveta momukunda Ohailulu moshitopolwa shaHangwena.
Ehangano ndyoka otaku hokololwa lya kala tali fulu omalambo gomavi momukunda ngoka pokati kaAugust 2018 naSeptemba 2020 omanga kaali na omukandapitikilo gwomudhingoloko ngoka hagu gandjwa kuuministili wOmidhingoloko, Omakuti, nOmatelelopo.
