Ehangano lyetonatelo lyopoongamba negongelo lyiihohela yepangelo lyedhina Namibia Revenue Agency (Namra) olya tseyitha kutya itali ka pitika we moshilongo mu etwe iikulya ngaashi omakoloni, omagadhi gokulya, osho wo omalovu goWiski gedhina ‘Best’ molwashoka iinima mbyoka okwa ndhindhilikwa inaayi adha iipumbiwa yomilandu dhuundjolowele.
Namra okwa popi kutya iinima mbyoka itayi pitikilwa we moshilongo medhina kutya iikwatelwa yawo [yiinima mbyoka] inayi yelitha nawa kombinga yesiku tayi kwisha, kutya oya longwa nashike, ishewe inayi shangwa melaka lyOshiingilisa, omanga uupakete womakaya goYES inawu tulwa uuyelele welondodho ngaashi tashi uthwa pamulandu.
Pauyelele womukanda gwiikundaneki ngoka gwa pitithwa komupopiliko gwaNamra, Tonateni Shidhudhu oshiwike shika, onkalo yiinima tayi etwa moshilongo omanga inaayi yelithwa mpoka ya thikama, oyi na uuwinayi kwaamboka taye yi longitha unene tuu kuundjolowele wawo.
Onkene kehe oshilongomwa tashiya moshilongo oshi na okukala shi li moshikwatelwa shasho sha yela nawa opo ku shilipalekwe kutya uundjolowele woonakushilongitha owa gamenwa.
“Ookastoma otadhi indilwa dhi kale tadhi tala nawa nokukala dha kotoka uuna taya landa iikulya mbyoka hazi koAngola, molwashoka yimwe ohayi kala ya longwa niinima ya nika oshiponga ishewe yimwe ihayi kala nomasiku gesiku tayi kwisha,” osho Shidhudhu a popi ngaaka.
Okwa gwedha po kutya iinima yimwe ngaashi oombe ndhoka tadhi etwa moshilongo nelalakano lyongeshefa ohadhi futithwa iihohela yopelesenda 10 uuna tadhi zi miilongo mbyoka kaayi li oshitopolwa South African Custom Union (SACU).
SACU ongongahangano yiilongo yontumba muumbugantu wenenevi Africa, mwa kwatelwa Namibia, mbyoka yi imanga uukuni kumwe okushunitha pevi iihohela yiifuta yopoongamba dhiilongo mbyoka yi li iilyo[yo-Sacu].
“Iifuta yopoongamba oya yooloka shi ikwatelela kiilongomwa. Oshiholelwa, iikwamuma ihayi futithwa iihohela yokongulu poongamba kutya nee oya zi peni,”osho a popi ngaaka.
Shidhudhu okwa popi kutya okwe eta iinima ngaashi iikuni nelalakano lyongeshefa ohayi uthwa kOveta yo2001 yIipindi yOpaigwana yOmiti ndhoka dhi li moshiponga shokuhula ko osho wo Ekondololo lyOmidhingoloko. Omweeti gwiikuni moshilongo oku na okukala e na omukandapitikilo dhokwe eta iinima moshilongo osho wo dheteyo, niihohela yokongulu ohayi pulwa owala uuna iikuni mbyoka ya za komiti dha gamenwa ngaashi omithiya, omikwa, omisati, omipapa, omikuku, omigongo osho wo omihongo.
Shidhudhu okwa gwedha po kutya okwe eta iinima moshilongo shaa li palalakano lyokulanditha ihayi futithwa poongamba ngaashi tashi uthwa mOveta yIihohela nIifuta yopoongamba, nosha yelithwa kutya “okiinima mbyoka tayi etwa moshilongo kaakwiilongo, kaatalelipo, kwaamboka taya galukile kegumbo osho wo aafaalelwa yalwe, nelalakano lyokuyilongitha paumwene” yongushu [yi li meni] lyooN$5 000 ihayi futithwa nande nande.
“Ekuthilwo ko lyiifuta mbyoka ohali gandjwa momuntu kehe muule wethimbo lyomasiku ge li 30, naashoka inashi kwatela mo iinima ye etwa moshilongo kaantu mboka taya galuka muule womasiku inaaga konda poowili 48. Iinima mbyoka ya konda ongushu yooN$5 000 ohayi futithwa iifuta yoopelesenda 20. Endhindhiliko lyiinima tayi ya moshilongo lyoNA305 ohali longithwa opo ku shilipalekwe kutya mboka taye ya moshilongo oya gwanitha po iifuta osho wo okukwashilipaleka kutya iinima mbyoka ya pitilila ongushu yooN$5 000 oya futa iihohela tayi pulwa,” osho a popi ngaaka.
